ភ្លាមៗក្រោយកូនប្រុសលោកអេង ឆៃអ៊ាងបានបង្ហោះសាររៀបរាប់អំពីបំណងចង់បង្កើតគណបក្សនយោបាយ លោក អេង ឆៃអ៊ាង អនុប្រធានអតីតគណបក្សសង្គ្រោះជាតិ បានអំពាវនាវកុំឲ្យមហាជនចាប់អារម្មណ៍ ព្រោះកូនប្រុសរបស់លោកកំពុងមានបញ្ហាសុខភាព។
នៅលើគណនីយហ្វេសប៊ុកលោក អេង ឆៃអ៊ាង បានសរសេរថា៖ «អេង រតនៈ កូនប្រុសខ្ញុំ គាត់មានបញ្ហាសុខភាព ដែលក្រុមគ្រួសារខ្ញុំ កំពុងខ្វល់ខ្វាយយ៉ាងខ្លាំង ។ ដូច្នេះ សូមបងប្អូនជនរួមជាតិ កុំយកចិត្តទុកដាក់ឬចាប់អារម្មណ៍នឹងការសរសេរផុសតាមបណ្តាញសង្គមរបស់គាត់»។
គួរបញ្ជាក់ថា កូនប្រុសលោក អេង ឆៃអ៊ាង គឺលោក អេង រតនៈ បានប្រកាសលើគណនីយហ្វេសប៊ុកចង់បង្កើតគណបក្សថ្មីដែលមានស្ត្រីឈរឈ្មោះជាបេក្ខជននាយករដ្ឋមន្ត្រី នៅថ្ងៃទី២៧ ខែមេសា ឆ្នាំ២០១៨។
សូមរំលឹកថា លោក អេង រតនា កូនប្រុសច្បងរបស់ លោក អេង ឆៃអ៊ាង ដែលជាអតីត អនុប្រធានគណបក្សសង្គ្រោះជាតិ បានប្រកាសបង្កើត គណបក្សនយោបាយថ្មីមួយ ដើម្បីចូលរួមការបោះឆ្នោតឆ្នាំ២០១៨នេះ ដោយដាក់ឈ្មោះថា “គណបក្សសម្តេចឪ”។
កូនប្រុសអ្នកនយោបាយគំាទ្របក្សប្រឆាំង លោក អេង រតនា ដែលរួចផុតពីការហាមឃាត់ មិនឲ្យធ្វើនយោបាយ បានសរសេរលើបណ្តាញសង្គមហ្វេសប៊ុក នៅថ្ងៃទី២៧ ខែមេសា ឆ្នាំ២០១៨ថា “គណបក្សសម្តេចឪ” និងឡូហ្គោលអ៊ុនតាក់ នឹងដំណើរការជាផ្លូវការនាពេលខាងមុខ។ ខ្ញុំនឹងឆាប់ចុះបញ្ជី ដើម្បីឲ្យទាន់បញ្ជីរៀបចំបេក្ខជនពីគ.ជ.ប។ អតីតភាពល្បីៗ ពីអតីតគណបក្សប្រឆាំងធំជាងគេ នឹងចូលរួមជាមួយខ្ញុំ”។
លោកបន្តថា យុវជនជាច្រើននឹងអាចមានមុខ ក្នុងបញ្ជីបេក្ខជនតំណាងរាស្ត្រ ឬក៏អាចបានកៅអីតំណាងរាស្ត្រតែម្តង។ លោក អេង រតនា បានអះអាងបន្តថា លោកនឹងជួប លោក សាម អ៊ីន អ្នកនាំពាក្យ គណបក្សប្រជាធិបតេយ្យមូលដ្ឋាន ដើម្បីបង្កើតសម្ព័ន្ធធំមួយ ជាមួយគ្នា រួចហើយបញ្ចុះបញ្ចូលគាត់ ឲ្យមកឈរនៅខាងគណបក្ស របស់លោកវិញ តែឈ្មោះបក្សគាត់អាចនៅរក្សាដដែល ហើយបេក្ខជននៅមណ្ឌលផ្សេង ក៏នៅតែអាចដាក់បានដដែល សម្រាប់បក្សរបស់គាត់។ លោកថា រាជធានីភ្នំពេញ ជាមណ្ឌលដែលគណបក្សប្រឆាំងខ្លាំង និងជាប់យូរបំផុត។
ការប្រកាសបង្កើតគណបក្ស របស់កូនប្រុសអតីត មន្ត្រីជាន់ខ្ពស់បក្សប្រឆាំង ធ្វើឡើង បន្ទាប់ពីកូនប្រុស លោក គង់ គាំ គឺលោក គង់ មុនីកា បានបង្កើតគណបក្សថ្មីមានឈ្មោះថា “គណបក្សឆន្ទៈខ្មែរ” ដើម្បីចូលរួមប្រកួតប្រជែង ការបោះឆ្នោតជ្រើសតាំង អ្នកតំណាងរាស្ត្រនៅថ្ងៃទី ២៩ ខែកក្កដា ឆ្នាំ២០១៨ខាងមុខ។
សង្កេតឃើញថា ខណៈនៅសល់មិនប៉ុន្មានខែទៀតទេ នឹងឈានចូល ដល់ការបោះឆ្នោតថ្នាក់ជាតិនោះ កំណើននៃការបង្កើតគណបក្សថ្មីៗ គឺមានចំនួនយ៉ាងច្រើន គួរឲ្យចាប់អារម្មណ៍ ។ គណបក្សទើបបង្កើតថ្មីមាន គណបក្សប្អូនប្រុសរបស់លោក កែម ឡី បក្សកូនប្រុសលោក គង់ គាំ និងបក្សកូនលោកអេង ឆៃអ៊ាង ជាដើម ដែលសុទ្ធតែចេញមក ពីប្រភពបុគ្គលល្បីៗ៕
