ភ្នំពេញ៖ មន្រ្តីជានខ្ពួសកម្ពុជាច្រើនរូបរួមទាំងលោកនាយករដ្ឋមន្រ្តី ហ៊ុន សែន និងរដ្ឋមន្រ្តីក្រសួងកសិកម្ម រដ្ឋមន្រ្តីក្រសួងធនធានទឹកបានអះអាងថាពួកគាត់រួមទាំងមន្រ្តីមួយ ចំនួនទៀតចាប់ផ្តើមដាក់ខ្លួនឱ្យនៅដាច់ដោយឡែក ក្រោយពីទទួលព័ត៌មានថារដ្ឋមន្រ្តីក្រសួង ការបរទេសហុងគ្រីដែលពួកគាត់បានជួបកាលពីម្សិលមិញមានផ្ទុកកូវីដ១៩។
លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានប្រាប់ វីអូឌីនៅរសៀល នេះថាលោកមិនទាន់ទទួលបានព័ត៌មានផ្លូវការពីក្រសួងក្រសួងសុខាភិបាលកម្ពុជានៅឡើយទេ ។ ទោះយ៉ាងណាក៏ដោយលោកថាលោកនិងមន្រ្តីក្រសួងដែលបានជួប ភីធើ សឺចាតូ (Péter Szijjártó) រដ្ឋមន្រ្តីការបរទេស និងពាណិជ្ជកម្មហុងគ្រីកាលពីម្សិលមិញនឹងធ្វើចក្តាឡីស័ក។
លោក វេង សាខុន ដែលទើបតែត្រលប់មកពីជួបពលរដ្ឋដែលរងគ្រោះដោយទឹកជំនន់នា ខេត្តពោធិ៍សាត់នារសៀលនេះបានប្រាប់យ៉ាងដូច្នេះថា៖ «ហ្នឹងហើយ បាទៗ[ខ្ញុំនឹងដាក់ខ្លួន ឯងដាច់ដោយឡែក១៤ ថ្ងៃ] ត្រូវតែគោរពទៅតាមអ្វីដែលជាវិធានការក្រសួងសុខាភិបាល»។
ដោយឡែករដ្ឋមន្រ្តីក្រសួងធនធានទឹក លោក លឹម គានហោ បានប្រាប់ថាលោកក៏ទើបតែទទួល បានដំណឹងនេះដែរ។ លោកបានឱ្យដឹងថាលោកបានជួបផ្ទាល់ជាមួយរដ្ឋមន្ត្រីក្រសួងការបរទេស ហុងគ្រីនោះតែរយៈពេលខ្លីប៉ុណ្ណោះ ហើយក៏មិនមានមន្រ្តីច្រើនចូលរួមដែរ។
លោកមានប្រសាសន៍ថា៖ខ្ញុំទើបតែដឹងមុនហ្នឹងដែរ ជួបតែមួយភ្លែតទេ ចាប់ដៃហើយដើរមកកន្លែងអង្គុយវិញ រួចបាញ់អាល់កុលដៃ។… ជួប[ផ្ទាល់]ច្រើន។ ខាងខ្ញុំ២-៣នាក់ ខាង[ក្រសួង]ផ្សេងៗមាន២-៣នាក់ទៀត។
លោក លឹម គានហោ បានបន្ថែមថាមន្រ្តីក្រសួងការបរទេសកម្ពុជាបានទាក់ទងមករូបលោកដោយប្រាប់ឱ្យរូបលោក និងមន្រ្តីដែលបានជួបប្រាស្រ័យផ្ទាល់ជាមួយរដ្ឋមន្រ្តីការបរទេសហុងគ្រីរូបនោះធ្វើតេស្តរកកូវីដ១៩។
សារព័ត៌មាន Associated Press (AP) បានស្រង់ប្រភពពីមន្រ្តីថៃ និងហុងគ្រី មកចុះផ្សាយថា លោក Peter Szijjarto និងគណៈប្រតិភូដែលមានសមាជិក ១២នាក់ត្រូវ បានធ្វើតេស្តរកវីរុសកូវីដ១៩ ប៉ុន្តែមានតែលោករដ្ឋមន្ត្រីការបរទេស ភីធើ ស៊ីចាតូ តែម្នាក់ប៉ុណ្ណោះ មានលទ្ធផលវិជ្ជមានវីរុសកូវីដ១៩។
រដ្ឋមន្ត្រីការបរទេសហុងគ្រីរូបនេះ បានចាកចេញពីប្រទេសកម្ពុជា ទៅកាន់ប្រទេសថៃ កាលពីល្ងាចថ្ងៃម្សិលមិញ ក្រោយពីបានបំពេញទស្សនកិច្ចជាផ្លូវការនៅកម្ពុជា ពេញមួយថ្ងៃ នៅថ្ងៃទី០៣ ខែវិច្ឆិកា ឆ្នាំ២០២០។
ក្នុងដំណើរទស្សនកិច្ចនៅកម្ពុជា លោក ភីធើ ស៊ីចាតូ បានជួបពិភាក្សាការងារជាមួយលោកនាយករដ្ឋមន្ត្រី ហ៊ុន សែន និងមន្ត្រីជាន់ខ្ពស់កម្ពុជាជាច្រើនរូបទៀត ក្នុងនោះមាន រដ្ឋមន្ត្រីក្រសួងកសិកម្ម លោកវេង សាខុន, រដ្ឋមន្ត្រីក្រសួងធនធានទឹក និងឧតុនិយម លោកលឹម គានហោ រដ្ឋមន្ត្រីក្រសួងពាណិជ្ជកម្ម លោក ប៉ាន សូរស័ក្តិ និងអនុប្រធានគណៈកម្មការកិច្ចការបរទេសនៃរដ្ឋសភា និងជាតំណាងរាស្រ្តមណ្ឌលខេត្តព្រះវិហារ លោក សួស យ៉ារ៉ា រួមទាំងមន្រ្តីកម្ពុជាមួយចំនួនទៀត៕
