ក្រុងបាងកក៖ អាកាសត្រជាក់ដ៏គួរឲ្យស្រួលខ្លួនគួបនឹងសម្រស់ផ្ការំចង់ចេញផ្កាស្កុះស្គាយឥតទីបញ្ចប់ក្នុងបឹងនេះ បានទាក់ទាញភ្ញៀវជាតិ និងទេសចរ ដែលចូលចិត្ដថតរូបមកកាន់ទីជនបទនៃខេត្ដអ៊ូដុនថានី ចម្ងាយប្រមាណ ៥៦០ គីឡូម៉ែត្រពី ក្រុងបាងកក។
បឹងរំចង់ ឬពាក្យផ្លូវការថា បឹងណុងហាម អាចត្រូវបានប្រទះភ្នែកក្នុងភូមិសានទីស៊ុក នៃខេត្ដអ៊ូដុនថានី។
វាជាបឹងទំហំ ៣២ គីឡូម៉ែត្រការ៉េ ពេញទៅដោយផ្ការំចង់រាប់ពាន់ដើមកំពុងរីកស្គុះស្គាយ។ វាបានអន្ទងចិត្ដមនុស្សម្នាកាលពីវិស្សមកាលចុងសប្ដាហ៍ ទាំងភ្ញៀវជាតិ និងអន្ដរជាតិមកថតរូបសែលហ្វីប្រចាំឆ្នាំ។
រីករាយជាមួយសម្រស់បុប្ផាដ៏ស្រស់ត្រកាលពីច្រាំងបឹងជាមួយអាហារពិកនិក ឬជួលទូកន្ទុយវែងតម្លៃតែ ១០០ បាត (៣ ដុល្លារ) ដើម្បីជិះគន់បឹងរំចង់កាន់តែច្បាស់ក្រឡែត។
យោងតាម CNN ដែលបានហៅបឹងនេះជាបឹងចម្លែកបំផុតមួយក្នុងលោក បានបង្ហាញថា៖ «ឧទ្យានលើផ្ទៃទឹកនេះចាប់ផ្ដើមដុះក្នុងខែតុលា ក្រោយរដូវភ្ញៀវបន្ដិច។ ពេលវាចេញផ្កាមីដេរដាសក្នុងខែធ្នូ អ្នកភូមិជិតខាង ដែលបានដឹងពីដើមកំណើតបឹងទាក់ទងនឹងព្រេងនិទានស្នេហាដ៏ជូរចត់ បានចេញទូកទៅទស្សនាទស្សនីយភាពធម្មជាតិមុនគេ។
សមុទ្ររំចង់ក្រហម តាឡាយ ប៊ួ ដែង តាមសម្ដីអ្នកស្រុក រំលេចនូវទេសភាពស្អាតបំផុតនាពេលព្រឹកព្រលឹម ពេលផ្កាបើកត្របកបង្ហាញនូវសំណើម និងរីកក្រហមមីដេរដាស។
យ៉ាងណាមិញ បើអ្នកខកខានក្នុងការគយគន់បឹងផ្ការំចង់ក្រហមនាររដូវកាលនេះ សម្រស់បុប្ផានេះនឹងនៅតែបន្ដបញ្ចេញសម្រស់រហូតដល់ខែមីនាឯណោះ៕
ប្រភព៖ Coconut Bangkok