មណ្ឌលគិរី៖ ជាទីកន្លែងសម្បូរទៅដោយបណ្តុំទេសភាពនៃព្រៃភ្នំលាយឡំនឹងព្រៃឫស្សីដុះយ៉ាងច្រូងច្រាង តាមផ្លូវថ្មើរជើងមានចម្ងាយ ៣ គីឡូម៉ែត្រ ចេញពីភូមិឋាននៃតំបន់សហគមន៍អេកូទេសចរណ៍អណ្តូងក្រឡឹង ទីកម្សាន្តធម្មជាតិទឹកធ្លាក់លែងក្រៀង កម្រនឹងភ្ញៀវទេសចរជិតឆ្ងាយណាបានប្រទះឃើញណាស់។
ទឹកធ្លាក់លែងក្រៀងនេះ មានទីតាំងស្ថិតនៅក្នុងភូមិអណ្តូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី ដោយទេសចរត្រូវចុះដើរតាមផ្លូវថ្មើរជើង ធូរស្រួលដោយចុះចំណោតដែលចំណាយពេល ៤០ នាទី ប៉ុណ្ណោះ តែពេលវិលត្រឡប់មកវិញឡើងតឹងង៉ាង ខណៈក៏មានផ្លូវដើរកាត់ដែរ ចំណាយពេលតិចដែរ តែពិបាកឡើងចំណោត ខ្លាំងដោយសារខ្វះការអភិវឌ្ឍផ្លូវឲ្យល្អ។
ទឹកធ្លាក់លែងក្រៀង នេះមាន ២ ជាន់ ដោយជាន់ទី ១ (ជាន់លើ) មានផ្ទាំងថ្មធំតូចនៅរណេងរណោង ជាទីកន្លែងអង្គុយលេងកម្សាន្ត និងអាចចុះងូតទឹកបានធំទូលាយ និងជាន់ទី ២ (ជាន់ក្រោម) មានទឹកធ្លាក់កម្ពស់ប្រមាណ ២ ម៉ែត្រ និងមានថ្លុកទឹកថ្លាជ្រៅអាចចុះហែលលេងបាន ជាមួយនឹងទឹកដ៏ត្រជាក់ស្រេង ខួបប្រាំងខួបវស្សា។
តំណាងពលរដ្ឋនៅក្នុងភូមិនៃតំបន់សហគមន៍អេកូទេសចរណ៍អណ្តូងក្រឡឹង លោក ណាច ណប់ ចង់ឲ្យអាជ្ញាធរ និងមន្ទីរទេសចរណ៍ និងបរិស្ថាន ដែលពាក់ព័ន្ធ មេត្តាជួយដោះស្រាយធ្វើផ្លូវឲ្យបានស្រួល ដើម្បីងាយស្រួលដល់ក្រុមទេសចរដែលនិយមចូលចិត្តលេងទឹកធ្លាក់ធម្មជាតិនោះ អាចនាំក្រុមគ្រួសារ ឬមិត្តភក្តិទៅលេងបាន។
នាពេលបច្ចុប្បន្ននេះ ទឹកធ្លាក់លែងក្រៀង កំពុងតែទាក់ទាញចំណាប់អារម្មណ៍ទេសចរបរទេសជាបណ្តើរៗហើយ ក្រោយពីមានក្រុមទេសចរចូលចិត្តផ្សងព្រេងដើរព្រៃ បានមកកម្សាន្តលេងម្តងម្កាលមកនោះ។
លោក ណាច ណប់ អ្នកសម្របសម្រួលផ្នែកសហគមន៍អេកូទេសចរណ៍អណ្តូងក្រឡឹងវ័យ ៣១ ឆ្នាំ ជាជនជាតិព្នង ដែលអាចនិយាយភាសាខ្មែរ និងអង់គ្លេសផងដែរនោះ បានលើកឡើងថា៖ «ក្រុមទេសចរបរទេស ដែលមកដល់ទីនេះ ពួកគាត់លាន់មាត់សរសើរថា ទឹកធ្លាក់លែងក្រៀងនេះ មានទិដ្ឋភាពបែបធម្មជាតិទាំងអស់ ហើយមានខ្យល់អាកាសល្អបរិសុទ្ធទៀត មានសភាពស្ងាត់ជ្រងំផងដែរ»។
ទោះបីជាយ៉ាងណាក្តីនេះ សម្រាប់ដំណើរកម្សាន្តឆ្ពោះទៅកាន់តំបន់ទឹកធ្លាក់លែងក្រៀង មិនសូវសម្បូរភ្ញៀវទេសចរខ្មែរពីចម្ងាយបានស្គាល់ទេគឺមានតែអ្នកសហគមន៍ស្គាល់ និងក្រុមទេសចរបរទេសចូលចិត្តដំណើរផ្សងព្រេងតែប៉ុណ្ណោះ ដោយសារមូលហេតុខ្វះការអភិវឌ្ឍ និងការផ្សព្វផ្សាយពីខាងផ្នែកពាក់ព័ន្ធ។
ដោយសារចង់មើលឃើញតំបន់ទេសចរណ៍ធម្មជាតិនេះ មានភ្ញៀវមកកម្សាន្តច្រើន និងអាចឲ្យប្រជាជននៅសហគមន៍នេះអាចមានមុខរបរបន្ទាប់បន្សំលក់ដូរជាវត្ថុអនុស្សាវរីយ៍ ឬអាចបង្កើតនូវសេវាកម្មផ្សេងៗបាននោះ លោក ណាច ណប់ ក៏សំណូមពរថា៖ «ខ្ញុំមើលឃើញតំបន់ទេសចរណ៍ធម្មជាតិនេះ មានសក្តានុពលល្អ សម្រាប់វិស័យទេសចរណ៍ ព្រោះតំបន់ទាំងនេះនៅមានលក្ខណៈបែបធម្មជាតិសុទ្ធសាធ ទេសភាពល្អស្រស់បំព្រង។ តែផ្លូវដើរចូលទីកន្លែងលេងទឹកធ្លាក់លែងក្រៀង ដូចជានៅពិបាកសម្រាប់ទេសចរជាតិពីចម្ងាយធ្វើដំណើរ ដូច្នេះខ្ញុំចង់ឲ្យខាងអាជ្ញាធរ ក៏ដូចជាផ្នែកពាក់ព័ន្ធនានាក្នុងវិស័យទេសចរណ៍តែម្តងជួយសម្រួលធ្វើផ្លូវចូលឲ្យបានស្រួលផង»៕
ប្រភព៖ The Phnom Penh Post