ខ្សែបម្រើ Keisuke Honda របស់ក្រុមជម្រើសជាតិជប៉ុន បានស្ម័គ្រចិត្តមកដឹកនាំក្រុមគោព្រៃកម្ពុជា ដោយមិនយកថ្លៃនឿយហត់ឡើយ។
ដំណឹងដ៏គួរឲ្យភ្ញាក់ផ្អើលបានប្រកាសកាលពីព្រឹកមិញ ដែលអតីតសមាជិក AC Milan រូបនេះ បានចូលខ្លួនមកកាច់ចង្កូតបាល់ទាត់កម្ពុជា ដោយពុំមានប្រាក់ខែឡើយ។ ប៉ុន្តែយ៉ាងណា សហព័ន្ធបាល់ទាត់កម្ពុជាបានចេញថ្លៃធ្វើដំណើរ និងចំណាយផ្សេងៗជូនអ្នកចាត់ការថ្មីរូបនេះ។
គួររម្លឹកថា កៅអីគ្រូជម្រើសជាតិបានទំនេរតាំងពីសហព័ន្ធបាល់ទាត់កម្ពុជាបានចែកផ្លូវជាមួយលោក Leonardo មកម្លេះ។
នៅលើគណនី Twitter របស់ខ្លួនកីឡាករវ័យ ៣២ ឆ្នាំរូបនេះក៏បានបង្ហោះវីដេអូនិយាយពីការកំពុងស្នាក់នៅកម្ពុជា និងគម្រោងដើរមើលទីកន្លែងមួយចំនួនដែលស្ថិតក្នុងគម្រោងសប្បុរសធម៌របស់គាត់ផងដែរ។
ដោយឡែក Honda ទើបតែចុះកុងត្រាថ្មីជាមួយក្លឹបនៅអូស្ត្រាលីមិនទាន់បានមួយខែផង។ ប៉ុន្តែគេនៅពុំទាន់ដឹងថា Honda នៅជាកីឡាករ Melbone Victory ឬយ៉ាងណាឡើយ។
ប្រភពព័ត៌មានមិនផ្លូវការមួយចំនួនបាននិយាយថា Honda នឹងដឹកនាំកូនក្រុមរបស់ខ្លួនតាមរយៈ Video Conference ជារៀងរាល់សប្តាហ៍។ ប្រសិនបើនេះជាដំណឹងពិតមែន មិនដឹងថាវាអាចដំណើរការទៅបានល្អ ឬ យ៉ាងណានោះទេ។ យើងនឹងបន្តធ្វើបច្ចុប្បន្នភាពពីរឿងនេះនៅពេលក្រោយទៀត៕