ភ្នំពេញ៖ នាព្រឹកថ្ងៃទី២ ខែវិច្ឆិកា ឆ្នាំ២០២០ក្នុងកិច្ចប្រជុំពេញអង្គនៃរដ្ឋសភាកម្ពុជា បានអនុម័តសេចក្តីព្រាងច្បាប់ស្តីពីការអនុម័តយល់ព្រមលើពិធីសារខណ្ឌសីមា និងបោះបង្គោលព្រំដែនគោករវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម។
លោក ឡេង ប៉េងឡុង អគ្គលេខធិការនិងជាអ្នកនាំពាក្យរដ្ឋសភាបានបញ្ចាក់ថាសេចក្តីព្រាងច្បាប់ស្តីពីការអនុម័តយល់ព្រមលើពិធីសារខណ្ឌសីមា និងបោះបង្គោលព្រំដែនគោករវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម គឺជាសេចក្តីព្រាងច្បាប់ ដែលអនុញ្ញាតឲ្យប្រើប្រាស់ផែនទីថ្មីខ្នាត ១/២៥ ០០០ (១លើ២៥ពាន់) រវាងកម្ពុជានិងវៀតណាម។
លោក ពន្យល់ថា ដ្បិតផែនទីថ្មីនេះ ត្រូវបានចុះហត្ថលេខាយល់ព្រមដោយគណៈកម្មាធិការកិច្ចព្រមដែនរបស់កម្ពុជានិងវៀតណាមក្តី ប៉ុន្តែ ត្រូវឆ្លងកាត់ការបោះឆ្នោតយល់ព្រមពីរដ្ឋសភានិងព្រឹទ្ធសភា ហើយព្រះមហាក្សត្រ ចេញព្រះរាជក្រមប្រកាសឲ្យប្រើប្រាស់សិន ទើបអាចយកមកប្រើប្រាស់បាន។ លោកបញ្ជាក់ថា៖តាមផ្លូវច្បាប់យើងត្រូវធ្វើអ៊ីចឹង ទើបចូលជាធរមាន។
អតីតគណបក្សសង្គ្រោះជាតិ បានចេញសេចក្តីថ្លែងការណ៍ពីក្រៅប្រទេសមក ដោយប្រកាសបដិសេធមិនទទូលស្គាល់សេចក្តីព្រាងច្បាប់ស្តីពីការអនុម័តយល់ព្រមលើពិធីសារខណ្ឌសីមា និងបោះបង្គោលព្រំដែនគោករវាងកម្ពុជានិងវៀតណាម ដោយអតីតគណបក្សប្រឆាំងដ៏ធំមួយនេះ យល់លថា សេចក្តីព្រាងច្បាប់នេះ គឺខុសច្បាប់ហើយធ្វើឲ្យកម្ពុជា បាត់ដីទៅវៀតណាម។
យ៉ាងណាក៏ដោយ កន្លងមក គណៈកម្មាធិការកិច្ចការព្រំដែនកម្ពុជា ក៏ដូចជារដ្ឋាភិបាល កម្ពុជា បកស្រាយជាច្រើនដងមកហើយថា ការបោះបង្គោកព្រំដែននិងការធ្វើផែនទីថ្មី មិនធ្វើឲ្យកម្ពុជា បាត់ដីទៅវៀតណាមឡើយ។
នាថ្ងៃទី១ ខែសីហា ឆ្នាំ២០២០ គណៈកម្មាធិការកិច្ចព្រំដែនកម្ពុជានិងវៀតណាម បានចុះហត្ថលេខាលើឯកសារផែនទីថ្មី មានឈ្មោះជាផ្លូវការថា ផែនទីលេខាព្រំដែន ខ្នាត ១/២៥ ០០០ នៅច្រកទ្វារព្រំដែនអន្តរជាតិម៉ុកប៉ៃ ខេត្តតៃនិញ ប្រទេសវៀតណាម។ ផែនទីនេះ ត្រូវបានបោះពុម្ពសរុប៥០០ផ្ទាំង ដោយប្រទេសដាណឺម៉ាក។ ២៥០ផ្ទាំង ប្រគល់មកឲ្យកម្ពុជា ហើយ២៥០ផ្ទាំង ប្រគល់ទៅឲ្យវៀតណាម។
បច្ចុប្បន្ន កម្ពុជា-វៀតណាម បានធ្វើខណ្ឌសីមានិងបោះបង្គោលព្រំដែនជាមួយគ្នា បាន៨៤ភាគរយហើយ ហើយផែនទីខ្នាត ១/២៥ ០០០ គឺជាផែនទី ដែលបង្ហាញពីការកំណត់ខណ្ឌសីមានិងការបោះបង្គោលព្រំដែន៨៤ភាគរយនេះឯង។ ភាគទាំងពីរ ប្តេជ្ញាចិត្តទាំងអស់គ្នា ថានឹងពន្លឿនឲ្យឆាប់ចប់លើការបោះបង្គោលព្រំដែន១៦ភាគរយទៀត ដែលនៅសល់។
ក្នុងពិធីប្រគល់ផែនទីថ្មីខ្នាត ១/២៥ ០០០ ដល់ក្រសួង-ស្ថាប័នពាក់ព័ន្ធចំនួន៣៥ នៅកម្ពុជា ដើម្បីយកទៅប្រើប្រាស់ ដែលរៀបចំឡើងកាលពីថ្ងៃទី២៧ ខែសីហា ឆ្នាំ២០២០ នៅវិមានសន្តិភាព លោក វ៉ា គឹមហុង ប្រធានគណៈកម្មាធិការកិច្ចការព្រំដែន អះអាងថា កម្ពុជា គ្រោងយកផែនទីថ្មីខ្នាត ១/២៥ ០០០ (១លើ២៥ពាន់) ទៅតម្កល់ទុកនៅអង្គការសហប្រជាជាតិ។ ប៉ុន្តែ លោក ពុំបានបញ្ជាក់ឡើយថា នៅពេលណា។
បើមាត្រដ្ឋានឬខ្នាត មានតួលេខកាន់តែតូច គឺផែនទី មានទំហំកាន់តែធំ ហើយផ្ទុយមកវិញ បើមាត្រដ្ឋានឬខ្នាត មានតួលេខកាន់តែធំ គឺផែនទី មានទំហំកាន់តែតូច។ ជាក់ស្តែង ផែនទីលេខាព្រំដែន ខ្នាត ១/២៥ ០០០ គឺមានទំហំធំជាងផែនទី UTM ខ្នាត ១/៥០ ០០០ ហើយផែនទី UTM ខ្នាត ១/៥០ ០០០ មានទំហំធំជាងផែនទីបោនខ្នាត ១/១០០ ០០០។
១/២៥ ០០០ គឺប្រវែង១សង់ទីម៉ែត្រ លើផែនទី ស្មើនឹង២៥ ០០០ សង់ទីម៉ែត្រ ឬ២៥០ម៉ែត្រ នៅលើដី។ ១/៥០ ០០០ គឺប្រវែង១សង់ទីម៉ែត្រ លើផែនទី ស្មើនឹង៥០ ០០០ សង់ទីម៉ែត្រ ឬ៥០០ម៉ែត្រ នៅលើដី។ ១/១០០ ០០០ គឺប្រវែង១សង់ទីម៉ែត្រ លើផែនទី ស្មើនឹង១០០ ០០០ សង់ទីម៉ែត្រ ឬស្មើនឹង១០០០ម៉ែត្រ ឬស្មើនឹង១គីឡូម៉ែត្រ នៅលើដី៕
