សហភាពអឺរ៉ុបនៅថ្ងៃទី៣០ កក្កដា បានចេញមុខមកប្រតិកម្មទៅនឹងការបោះឆ្នោតជាតិនៅកម្ពុជាដែលទើបបញ្ចប់កាលពីថ្ងៃទី២៩ កក្កដា។ តាមរយៈអ្នកនាំពាក្យសម្រាប់កិច្ចការបរទេស និងគោលនយោបាយសន្តិសុខ សហភាពអឺរ៉ុបបានចាត់ទុកការបោះឆ្នោតនៅកម្ពុជាថា មិនតំណាងឲ្យឆន្ទៈប្រជាធិបតេយ្យរបស់អ្នកបោះឆ្នោតទេ ពោលគឺការបោះឆ្នោតនេះខ្វះនូវការជឿជាក់។ ប្រតិកម្មពីអឺរ៉ុបនេះ ធ្វើឡើងបន្ទាប់ពីប្រទេសប្រជាធិបតេយ្យមួយចំនួនក៏បានបញ្ចេញប្រតិកម្មផ្សេងៗគ្នាចំពោះការបោះឆ្នោតនៅកម្ពុជានេះ។
តាមរយៈសេចក្តីថ្លែងការណ៍របស់អ្នកនាំពាក្យស្តីពីការបោះឆ្នោតសកលនៅកម្ពុជា សហភាពអឺរ៉ុបបានអះអាងថា ការបោះឆ្នោតនៅថ្ងៃទី២៩ កក្កដា បានរៀបចំឡើងក្នុងបរិយាកាសដាក់កម្រិតនយោបាយខ្ពស់បំផុត។ បើតាមសហភាពអឺរ៉ុប នេះគឺដោយសារតែនៅមុនការបោះឆ្នោត អាជ្ញាធរកម្ពុជាបានប្រើប្រាស់ប្រព័ន្ធយុត្តិធម៌របស់ប្រទេស និងទម្រង់ផ្សេងទៀតនៃការគាបសង្កត់ ដើម្បីដាក់កម្រិតលំហសម្រាប់បក្សប្រឆាំង ការរិះគន់ និងអ្នកប្រឆាំងរួមទាំងសង្គមស៊ីវិល។ ការណ៍នេះ បានឈានទៅដល់ការរំលាយគណបក្សសង្រ្គោះជាតិ ការចាប់ឃុំខ្លួនលោកកឹម សុខា ការហាមធ្វើនយោបាយរបស់សមាជិកបក្សប្រឆាំង១១៨រូប ក៏ដូចជាការកម្រិតលើប្រព័ន្ធផ្សព្វផ្សាយ។ នេះបើតាមការសហភាពអឺរ៉ុបដដែល។
ដូច្នេះហើយសម្រាប់សហភាពអឺរ៉ុប ការខ្វះនូវការប្រកួតប្រជែងការបោះឆ្នោតពិតប្រាកដ និងអវត្តមាននៃដំណើរការនយោបាយប្រាកដដោយការចូលរួម គឺមានន័យថា ការបោះឆ្នោតនៅថ្ងៃទី២៩ កក្កដាគឺមិនតំណាងឲ្យឆន្ទៈប្រជាធិបតេយ្យរបស់អ្នកបោះឆ្នោតនៅកម្ពុជា បានសេចក្តីថា ការបោះឆ្នោតនេះ គឺខ្វះនូវការជឿជាក់។ ទោះជាអះអាងដូចនេះក្តី ក៏សហភាពអឺរ៉ុបរំពឹងថា អាជ្ញាធរកម្ពុជានឹងស្តារលទ្ធិប្រជាធិបតេយ្យឡើងវិញដោយចូលរួមក្នុងការសន្ទនាជាមួយគណបក្សប្រឆាំង និងបង្កើតឲ្យមានលក្ខខ័ណ្ឌអំណោយផលសម្រាប់ការជជែកដេញដោលខាងនយោបាយ ហើយថា អឺរ៉ុបបានត្រៀមខ្លួនរួចរាល់ហើយក្នុងការជួយដល់កិច្ចការនេះ។
បន្តកន្ទុយពីសហភាពអឺរ៉ុបនេះគឺប្រទេសបារាំង។ បារាំងតាមរយៈអ្នកនាំពាក្យរងក្រសួងកិច្ចការបរទេស និងអឺរ៉ុប បានសម្តែងនូវការសោកស្តាយចំពោះការបោះឆ្នោតនៅកម្ពុជាដោយគ្មានការចូលរួមពីអតីតគណបក្សសង្រ្គោះជាតិ។ ជាមួយនឹងការសោកស្តាយ បារាំងក៏បានអំពាវពាវឲ្យដោះលែងលោកកឹម សុខា និងអនុញ្ញាតឲ្យសមាជិកអតីតបក្សប្រឆាំងទាំង១១៨នាក់ធ្វើនយោបាយឡើងវិញ។ បារាំងក៏បានជំរុញឲ្យអាជ្ញាធរកម្ពុជាគោរពសិទ្ធិជាមូលដ្ឋានដែលធានាដល់ដំណើរការប្រជាធិបតេយ្យ។
ក្រៅតែពីសហភាពអឺរ៉ុប និងប្រទេសបារាំងនេះ ក៏មានប្រទេសប្រជាធិបតេយ្យចំនួន៣ទៀតគឺសហរដ្ឋអាមេរិក អូស្រ្តាលី និងប្រទេសកាណាដាបានចេញប្រតិកម្មជាបន្តបន្ទាប់ចំពោះការបោះឆ្នោតនៅកម្ពុជានេះផងដែរ។សហរដ្ឋអាមេរិក អូស្រ្តាលី បានសម្តែងនូវការសោកស្តាយ និងខកចិត្តចំពោះការបោះឆ្នោតនេះ ខណៈកាណាដាអះអាងថា ការបោះឆ្នោតពោរពេញដោយការបំភិតបំភ័យអ្នកបោះឆ្នោត។ បន្ថែមលើនេះ ប្រទេសទាំងបីក៏បានអំពាវនាវឲ្យមានការដោះលែងលោកកឹម សុខា ជំរុញរដ្ឋាភិបាលកម្ពុជាឲ្យជជែកខាងនយោបាយ និងស្តារឡើងវិញនូវសេរីបញ្ចេញមតិជាដើម។
បើទោះបីសហភាពអឺរ៉ុប និងប្រទេសទាំងនេះបានចេញប្រតិកម្មផ្សេងៗចំពោះការបោះឆ្នោតនៅកម្ពុជាក៏ដោយ ក៏ប៉ុន្តែអ្នកសង្កេតការណ៍អន្តរជាតិមកពី៧ប្រទេសដែលចូលរួមសង្កេតការណ៍ការបោះឆ្នោតកម្ពុជាបានប្រកាសគាំទ្រការបោះឆ្នោតនេះ។ អ្នកសង្កេតការណ៍ទាំងនេះ មកពីប្រទេសចិន រុស្ស៊ី ឥណ្ឌា ម៉ាឡេស៊ី ថៃឡាវ និងប្រទេសវៀតណាម។ ពួកគេបានអះអាងថា ការបោះឆ្នោតក្នុងប្រទេសកម្ពុជា បានប្រព្រឹត្តទៅដោយសេរី យុត្តិធម៌ និងតម្លាភាព៕
