ភ្នំពេញ៖ ក្រុមហ៊ុន KrisEnergy មានមូលដ្ឋាននៅប្រទេសសិង្ហបុរីដែលជាប្រតិបត្តិករបូមប្រេងប្លុក A ក្នុងសមុទ្រកម្ពុជានៅតែរក្សាដំណើរការក្នុងការបូមប្រេងពីការដ្ឋានខួងប្រេងរបស់ខ្លួននៅកម្ពុជានៅឆ្នាំក្រោយ និងបានបញ្ជាក់ជាថ្មីនូវការប្ដេជ្ញាចិត្តរបស់ខ្លួនចំពោះគម្រោងនេះ។
បន្ទាប់ពីការចុះហត្ថលេខាលើកិច្ចព្រមព្រៀងប្រេងជាមួយរដ្ឋាភិបាលកម្ពុជា និងការទទួលបានការអនុញ្ញាតការផលិតសម្រាប់ប្លុក A កាលពីខែសីហាឆ្នាំមុន ក្រុមហ៊ុននេះព្យាករថា ខ្លួននឹងចំណាយ ៣៩,៤ លានដុល្លារលើគម្រោងកម្ពុជាក្នុងឆ្នាំ ២០១៨ ច្រើនជាង ១ ភាគ ៣ នៃការចំណាយទុនដែលបានព្យាករសរុបរបស់ក្រុមហ៊ុនសម្រាប់ឆ្នាំនេះ។ នេះបើយោងតាមរបាយការណ៍ប្រចាំឆ្នាំ ២០១៧ របស់ខ្លួន។
របាយការណ៍នេះឲ្យដឹងថា៖ «ធនធានហិរញ្ញវត្ថុ និងប្រតិបត្តិការរបស់យើងនៅក្នុងឆ្នាំ ២០១៨ និងឆ្នាំ ២០១៩ នឹង ឆ្ពោះដោយផ្ទាល់ទៅលើទ្រព្យសកម្មស្នូលនៅកម្ពុជា និងថៃនៅឈូងសមុទ្រថៃដែលគម្រោងអភិវឌ្ឍន៍ប្រេងរបស់យើងមានវដ្ដពេលវេលាកាន់តែខ្លីដើម្បីចាប់ផ្ដើមបង្កើតលំហូរសាច់ប្រាក់ និងសកម្មភាពបេ្ដជ្ញាចិត្តដ៏សំខាន់ដូចដែលបានតម្រូវស្ថិតក្រោមកិច្ចព្រមព្រៀងអាជ្ញាប័ណ្ណរបស់យើង»។
ដើម្បីផ្ដល់ការយកចិត្តទុកដាក់ចំពោះទ្រព្យសកម្មកម្ពុជា និងថៃ ក្រុមហ៊ុន KrisEnergy បានដកគម្រោងរបស់ខ្លួននៅក្នុងប្រទេសឥណ្ឌូនេស៊ី និងវៀតណាមកាលពីឆ្នាំមុន ដែលនាំឲ្យខាតបង់ ១៣៩,២ លានដុល្លារដែលភាគច្រើនត្រូវបានសន្មតចំពោះការសម្រេចចិត្តរបស់ខ្លួនក្នុងការបញ្ឈប់ការចូលរួមនៅក្នុងគម្រោង Aceh PSC នៅប្រទេសឥណ្ឌូនេស៊ី។
ក្រុមហ៊ុន KrisEnergy គ្រប់គ្រងភាគហ៊ុន ៩៥ ភាគរយនៅក្នុងប្លុក A ជាមួយនឹងការបែងចែកជាមួយក្រសួងសេដ្ឋកិច្ច និងហិរញ្ញវត្ថុដែលគ្រប់គ្រងភាគហ៊ុននៅសល់។
លោកស្រី Tanya Pang អនុប្រធានក្រុមហ៊ុន KrisEnergy ទទួលបន្ទុកទំនាក់ទំនងវិនិយោគិន និងទំនាក់ទំនងសាជីវកម្មថ្លែងថាក្រុមហ៊ុននេះកំពុងស្វែងរកដៃគូវិនិយោគក្នុងដើម្បី «កាត់បន្ថយហានិភ័យការចំណាយ និងភាគហ៊ុនក្នុងការចំណាយមូលធន» សម្រាប់គម្រោងនេះ។
លោកស្រី បន្ថែមថាដំណាក់កាលទី ១ នៃគម្រោងនេះរំពឹងថានឹងផលិតប្រេង ៨,១ លានបារ៉ែលជាមួយដំណាក់កាលបន្តបន្ទាប់ប៉ាន់ប្រមាណថានឹងទទួលបានប្រេងបន្ថែម ១,៦៥ លានបារ៉ែល ដែលស្ថិតក្រោមការប៉ាន់ប្រមាណធៀបនឹងការអះអាងរបស់ក្រសួងសេដ្ឋកិច្ចកាលពីខែសីហាមុនថា ប្លុក A ត្រូវបានគេជឿជាក់ថានឹងមានប្រេង ៣០ លានបារ៉ែល។
ការបារម្ភគឺថាគម្រោងនេះនឹងមិនបង្ហាញប្រាក់ចំណេញជាក់លាក់សម្រាប់ក្រុមហ៊ុននោះទេ។ នេះបើយោងតាមលោក Anthony Galliano អគ្គនាយកក្រុមហ៊ុន Cambodian Investment Management។ លោកថ្លែងថា Chevron ដែលបានប្រតិបត្តិការដំបូងនៅគម្រោងប្លុក A បានលក់ឲ្យ KrisEnergy ដោយសារខ្លួនបានសង្ស័យពីលទ្ធភាពជោគជ័យផ្នែកពាណិជ្ជកម្មរបស់គម្រោងនេះ។
រោងចក្រចម្រាញ់ប្រេងលើកដំបូងរបស់កម្ពុជាតម្លៃ ១,៦ ពាន់លានដុល្លារកំពុងត្រូវបានសាងសង់លើផ្ទៃដី ៣៥០ ហិកតាក្នុងខេត្តព្រះសីហនុដែលបានចាប់ផ្តើមកាលពីខែឧសភាឆ្នាំមុនហើយគ្រោងនឹងបញ្ចប់នៅពាក់កណ្តាលឆ្នាំ ២០១៩។
លោក ជៀប សួរ អ្នកនាំពាក្យក្រសួងរ៉ែ និងថាមពលបានថ្លែងថាតាមផែនការគម្រោងរបស់ក្រុមហ៊ុននឹងមិនមានការប្រែប្រួលនោះទេ។ លោកថ្លែងថា៖ «យើងទើបតែបានប្រជុំជាមួយក្រុមហ៊ុនកាលពីសប្តាហ៍មុនអំពីផែនការរបស់ពួកគេក្នុងការទាញយកប្រេងនៅកម្ពុជាតាមកម្មវិធីដែលបានកំណត់កាលបរិច្ឆេទនៃការទាញយកប្រេងនៅចុងឆ្នាំ ២០១៩ នេះនឹងមិនមានការប្រែប្រួលនោះទេ»។
លោកបន្តថាជាមួយនឹងរោងចក្រចម្រាញ់ប្រេងនឹងអាចជួយធ្វើឲ្យតម្លៃប្រេងឥន្ធនៈក្នុងស្រុកកាន់តែទាប។
លោកថ្លែងថា៖ «យើងសង្ឃឹមថាតម្លៃប្រេងសាំងនៅកម្ពុជានឹងប្រសើរដោយសារយើងមានទាំងរោងចក្រចម្រាញ់ប្រេង និងការផលិតប្រេងក្នុងស្រុក»។ លោកបន្ថែមថាប្រាក់ចំណូលបានពីការផលិតប្រេងនឹងផ្ដល់ទៅការអភិវឌ្ឍហេដ្ឋារចនាសម្ព័ន្ធរបស់កម្ពុជា ព្រមទាំងវិស័យអប់រំ និងវិស័យសុខាភិបាលរបស់ខ្លួនផងដែរ៕
ប្រភព៖ The Phnom Penh Post